नेपालको अर्थतन्त्रको मेरुदण्ड मानिने कृषि क्षेत्रलाई आधुनिक, व्यावसायिक र प्रतिस्पर्धी बनाउने उद्देश्यका साथ नेपालमा पहिलोपटक ‘नेपाल भूमी बैँक लिमिटेड’ (Nepal Bhumi Bank Ltd.) को स्थापना र सञ्चालन भएको छ । लामो समयदेखि चर्चामा रहेको ल्याण्ड बैंकको अवधारणालाई निजी क्षेत्रको सक्रियता र आधुनिक प्रविधिको फ्युजनका साथ यस बैंकले कार्यान्वयनमा ल्याएको हो ।

बैंकले आफ्नो आधिकारिक वेबसाइट www.nepalbhumibank.com.np मार्फत आफ्ना सेवा र उद्देश्यहरू सार्वजनिक गर्दै भू-व्यवस्थापनको क्षेत्रमा नवीन डिजिटल पद्धतिको सुरुवात गरेको छ । नेपालको कृषि भूमिको ठूलो हिस्सा बाँझो रहनु, जमिन खण्डीकरण हुनु र वास्तविक कृषकको भूमिमा पहुँच नहुनु जस्ता समस्याहरूको समाधानका लागि यो बैंक एउटा भरपर्दो ‘सेतु’ बन्ने विश्वास गरिएको छ ।

नेपालको कुल क्षेत्रफलको झन्डै २७ प्रतिशत जमिन कृषि योग्य छ, तर तथ्याङ्क अनुसार त्यसको झन्डै ३० प्रतिशत जमिन हाल बाँझो छ । वैदेशिक रोजगारीका कारण गाउँघरमा जनशक्ति अभाव हुनु, जग्गाधनी सहर वा विदेश पलायन हुनु र खण्डीकरणले गर्दा ठूलो क्षेत्रफलमा खेती गर्न कठिन हुनु नेपालको मुख्य समस्या हो ।

यस्तो अवस्थामा ‘नेपाल भूमी बैँक लिमिटेड’ ले जग्गाधनी र जग्गाको उपयोग गर्न चाहने लगानीकर्ता वा कृषकबीच व्यावसायिक मध्यस्थकर्ताको भूमिका खेल्नेछ । जग्गाधनीको स्वामित्व सुरक्षित गर्दै जमिनलाई उत्पादनमा जोड्ने यो अवधारणाले नेपाललाई खाद्यान्नमा आत्मनिर्भर बनाउने लक्ष्य राखेको छ ।